Y Media

Lal Krishna Advani health mein girawat ke karan hospital mein bharti

Amit Bhardwaj
14 Dec, 2024

Bhartiya Janata Party ke senior neta aur former Deputy Prime Minister Lal Krishna Advani ki tabiyat bigadne ke karan unhe Friday raat ko Delhi ke Apollo Hospital mein bharti karaya gaya. 97 saal ke Advani ji ko Neurology Department ke Dr. Vineet Suri ki dekhrekh mein rakha gaya hai, aur unki condition stable hai.

Isse pehle, June 2024 mein, unhe AIIMS mein bharti karaya gaya tha, jahan Urology Department ke Professor Dr. Amlesh Seth ki dekhrekh mein unka ilaaj hua tha. Unhe urine infection ke karan pareshani ho rahi thi, lekin ilaaj ke baad unki condition stable ho gayi thi aur unhe hospital se discharge kar diya gaya tha.

March 2024 mein, Rashtrapati Droupadi Murmu ne unke awas par jakar unhe desh ka sarvoch nagrik samman Bharat Ratna se sammanit kiya tha. Is avsar par Pradhan Mantri Narendra Modi, Up-Rashtrapati Jagdeep Dhankhar, aur anya senior neta maujood the.

Lal Krishna Advani ji ka Bhartiya rajniti mein mahatvapurn yogdan raha hai. Unhone 1998 se 2004 tak desh ke Grih Mantri aur 2002 se 2004 tak Up-Pradhan Mantri ke roop mein seva di hai. Woh Bhartiya Janata Party ke sansthapak sadasyon mein se ek hain aur party ko majboot banane mein unka aham yogdan raha hai.

YMedia unki jaldi sehatmand hone ki kamna karta hai.